Tân-c an fa (i’ êra cichîn
ch’i’ n’ tuchêva gnân ‘l tavlîn)
a la sîra i’ zîva ‘l bên
cun mi’ nùna lì d’avšên!
I’ guardêva cul quadrèt
atacâ lì, sûra al lèt,
ch’a m’ parîva tanto blîn:
la Madùna cun ‘l su’ Pîn,
i’ angiulîn tú-c a la tùnda
cun la cavilâra biùnda,
San Jusèf e, un pô pu’ šó,
stravacâ, a gh’è l’âši e ‘l bò.
Me i’ V’a-dšîva: “S’i’ sûn brâv
i’ pudrê gnîr a catâv,
a stâr Vosch, in cumpagnìa
cun Jusèf e cun Maria,
a fâr la pârta d’ l’angiulîn
d’ fiânch a Vu, Gesù Bambîn”!
Túti ‘l sîri i’ v’ la šmandêva,
ma cla pârta la n’ rivêva!
Pu’, int al crèsre, i’ m’ sûn distràt
a pensâr a di êter fat:
esperiênsa, ânch aventûra,
e ‘l prumìsi fati alûra
(me i’ n’ sò dîv cuma la sia),
i’ gli ho pêrsi adrê a la via.
I’ an i’ pàsi, e, dnâns al spè-c,
i’ ho capî ch’i’ sûn gnû vè-c.
Tra un piašêr e ‘na scunfìta
int al bilânc ed la mi’ vìta,
pr’êsre s-cèt, pr’êser sincêr,
l’é pu’ ‘l rènder che l’avêr.
Quand mia gnîr a l’ûtme piân,
i’ m’arcmànd, dêm una mân,
tirêm föra da ste mund
tút intêr e tút rutùnd!
Ma cla pârta i’ n’ V’la šmànd pu’,
câr ‘l mi’ Bambîn Gešù,
perché adès, cun i cavî biânch,
gras e gob, e un pô anca stânch,
bên ch’ la vàga i’ pudrê fâr
júst la pârta dal sumâr!
* * *
QUANDO RECITAVO IL SERMONCINO Tanti anni fa (ero piccino che non raggiungevo il tavolo) alla sera dicevo le orazioni con la nonna accanto. Guardavo quel quadretto appeso sopra il letto che mi sembrava tanto carino: la Madonna con il suo Bambino, tutto intorno gli angeli con la chioma bionda, San Giuseppe, e, poco più in basso, sdraiati, vi erano l’asino e il bue. Vi dicevo: “Se sono bravo potrei venire a trovarVi e stare con Voi, in compagnia di Giuseppe e di Maria, a fare la parte dell’angiolino a fianco a Voi, Gesù Bambino”! Tutte le sere Ve la chiedevo, ma quella parte non arrivava mai. Poi, nel crescere, mi sono distratto a pensare ad altre cose: esperienze, anche avventure, e le promesse fatte allora (non so perché) le ho smarrite lungo il cammino. Passano gli anni e, allo specchio, mi sono accorto d’essere diventato vecchio. Tra una soddisfazione e una sconfitta nel bilancio della mia vita, se debbo essere proprio sincero, è più il dare che l’avere. Quando bisognerà salire all’ultimo piano, mi raccomando, datemi una mano, tiratemi fuori da questo mondo tutto intero, tutto completo. Ma quella parte non Ve la chiedo più, caro il mio Bambin Gesù, perché adesso, coi capelli bianchi, ingrassato, un poco ricurvo, e anche stanco, ben che vada potrei fare giusto la parte del somaro!
